忻口戰役係抗日戰爭初期最激烈嘅戰役之一，亦係當時國共兩黨於軍事上互相配合，以抗擊日軍嘅一場仗。忻口戰役由1937年10月13號開始，打到11月2號。半個月血戰之中，中國共有超過二十萬人同埋30架飛機參戰，而日軍就有七萬幾人，再加150架坦克、350支大炮同300架飛機。

早於9月下旬，日軍南下進迫太原，佔領原平之後，10月開始向忻口北邊面嘅南懷化高地狂攻，當時守軍以炮兵同步兵協同作戰，雙方近距離交火，打到血肉橫飛，傷亡慘重。中國軍隊雖然守住陣地，但超過十萬人犧牲，而日軍就死咗兩萬幾人。直至11月2號，中國第二戰區司令部下令退守太原，守軍撤退，最後日軍佔領忻口。日軍其後為之前嘅戰事失利報復，對南懷化百姓姦淫擄掠。